MIME motak: sarrera
Fitxategi baten formatua identifikatzeko du Internet Postako Xede Anitzeko Hedapenak [MIME] motak. Besteak beste, Interneteko arakatzaileek eta posta elektronikoko aplikazioek MIME mota erabiltzen dute fitxategiei zein ekintza egin erabakitzeko. Adibidez, eranskin baten formatua detektatu eta fitxategia ikusteko programa egokia aukeratzeko erabil dezake MIME mota posta elektronikoko aplikazio batek; esate baterako, testu-dokumentu bat irekitzeko gedit erabiltzeko.
Beste adibide bat. Nautilus fitxategi-kudeatzaileak MIME mota jakin behar du, fitxategiekin ataza hauek egiteko:
- Fitxategi bat dagokion aplikazioan irekitzea.
- Fitxategi mota azaltzen duen katea bistaratzea.
- Fitxategia irudikatzeko dagokion ikonoa bistaratzea.
- Fitxategia ireki dezaketen beste aplikazio batzuen zerrenda bistaratzea.
Mezu elektronikoen gorputza identifikatzeko estandar gisa proposatu zituzten MIME motak, hasieran. Gaur egun, hainbat sistemak erabiltzen dituzte MIME motak fitxategi-sistemako hautazko fitxategien formatua identifikatzeko. Honela osatzen dira MIME motak: goi-mailako euskarri mota dute, eta, ondoren, barra “/” batez bereizia, azpimotaren identifikatzailea. MIME motaren adibidea: image/jpeg. Adibideko euskarri mota “image” da, eta azpimotaren identifikatzailea, berriz, “jpeg”. Fitxategiaren edukiaren sailkapen orokor bat da goi-mailako euskarri mota; azpimotaren identifikatzaileak, berriz, fitxategiaren formatua berariaz identifikatzen du.
Zortzi euskarri mota onartzen ditu, gaur egun, IANAk [Internet Assigned Naming Authority]. Hauek dira zortzi euskarri mota horiek aplikazioa, audioa, irudia, mezua, modeloa, zati anitza, testua, bideoa. Euskarri mota bakoitzak hainbat azpimota ditu; ikus IANA webguneko MIME euskarri motak.
MIME motak honen arabera inplementatu dira GNOMEn: XDGren mime partekatuei buruzko informazio-zehaztapena. Zehaztapen horrek abantaila hauek ditu:
- MIMErekin zerikusia duten fitxategien kokaleku estandarrak.
- Aplikazioek MIME mota berriei buruzko informazioa erregistratzeko era estandarra.
- Fitxategi baten MIME mota eskuratzeko era estandarra.
- MIME motari buruzko informazioa eskuratzeko era estandarra.
MIME datu-basea osatzen duten fitxategiak eta direktorioak, XML iturburu-fitxategiei buruzko xehetasunak, MIME motak nola sortu edo aldatu, MIME mota jakin batzuk maneiatzeko aplikazioak nola erregistratu, eta, azkenik, GNOMEren mahaigainari aplikazio bat nola gehitu azaltzen da kapituluaren gainerako zatian.